«Mayns» yarim himoyachisi Nadim Amiri «Bavariya» vingeri Maykl Olisening o‘yinidan hayratda qolganini yashirmadi. «Karnavalchilar» amaldagi chempionlarni to‘xtatib qolishiga bir baxya qolgandi — tanaffusgacha tabloda 3:0 hisobi porlab turgan edi.
Biroq ikkinchi bo‘limda myunxenliklar o‘yinni tubdan o‘zgartirib yuborishdi va raqib darvozasiga javobsiz to‘rtta to‘p kiritishdi. Muvaffaqiyatsiz o‘tgan birinchi bo‘limdan so‘ng zaxiradan maydonga tushgan Olise mehmonlarning ikkinchi goliga mualliflik qildi.
«Men uchun Olise — ayni damda dunyoning eng yaxshi futbolchisi. U shunchaki o‘yin taqdirini hal qilmoqda», — dedi jurnalistlar bilan suhbatda Amiri.
Seshanba kuni Parijda «Bavariya» va «PSJ» o‘rtasidagi yarim final to‘qnashuvining ilk uchrashuvi bo‘lib o‘tadi. Bundesligada esa Vensan Kompani shogirdlari 31 turdan so‘ng 84 ochko jamg‘arib ulgurishdi.
