Madridning «Real» klubi markaziy himoyachisi Eder Militao olgan jarohatidan so‘ng jarrohlik amaliyotini muvaffaqiyatli o‘tkazdi. Bu haqda Ispaniya jamoasi matbuot xizmati rasmiy saytda xabar berdi.
Braziliyalik futbolchining chap oyoq son ikki boshli mushagining proksimal payi operasiya qilindi. Yaqin vaqt ichida Militao reabilitasiya jarayonlarini boshlaydi.
Avvalroq xabar berilganidek, 28 yoshli himoyachi taxminan besh oydan keyin safga qaytishi mumkin.
Joriy mavsumda Militao «qaymoqranglilar» tarkibida barcha turnirlarda 21 ta o‘yinda ishtirok etib, o‘z hisobiga ikkita gol va bitta golli uzatmani yozdirib qo‘ygan edi.













