Avval xabar berganimizdek, Madridning «Real» klubi ichida Kilian Mbappega nisbatan norozilik kayfiyati tobora kuchayib bormoqda. Ispaniya klubi uchun ushbu mavsum ko‘ngildagidek kechmayapti. Mbappe esa jarohat olgach, uni tezroq davolash va mavsumning eng mas’uliyatli pallasida, xususan, «el-klasiko» oldidan jamoadoshlari bilan ma’nan birga bo‘lish o‘rniga, barchasiga «qo‘l siltadi» va qaylig‘i bilan Sardiniyaga dam olishga yo‘l oldi.
Mbappe o‘zining seviklisi Ester Espozito hamrohligida Parijdan Sardiniyaning bosh shahri Kalyariga uchib ketayotganida ko‘rinish bergan. derbyderbyderby.it nashrining xabar berishicha, futbolchiga nisbatan e’tirozlarning asosiy sababi aynan shu. Shubhasiz, agar «Real» g‘alaba qozonayotgan bo‘lganida, bunday xulq-atvorga ko‘z yumish mumkin edi. Ammo jamoada kuchli bosim va keskinlik hukm surayotgan hozirgi sharoitda emas.
