Bugun Nodir Eliboyev boshchiligidagi yoshlar terma jamoamiz Turkiston shahridagi “Olimpik” sport majmuasida qo‘shni Qozog‘iston yoshlar terma jamoasiga qarshi rejalashtirilgan o‘rtoqlik uchrashuvlarining dastlabkisida maydonga chiqdi.

Bir yil muqaddam Bahraynda o‘tkazilgan Osiyo yoshlar o‘yinlarida mamlakatimiz sharafini himoya qilgan O‘zbekiston o‘smirlar terma jamoasi bazasida shakllantirilgan jamoamiz uchun bu bellashuv xalqaro maydondagi ilk uchrashuv bo‘ldi. Raqib esa kelgusi yil kuzida Astana shahrida o‘tkaziladigan 20 yoshgacha bo‘lgan terma jamoalar o‘rtasidagi Yevropa chempionatiga tayyorgarlik ko‘rayotgan Qozog‘iston yoshlar terma jamoasi edi.

Mazkur bahsda jamoamizning uzoq yo‘l bosib kelgani va bor-yo‘g‘i bir kunlik tayyorgarlikdan so‘ng maydonga tushgani, shuningdek, mezbonlarning yosh jihatdan ustunligi dastlabki daqiqalarda sezildi. Maydon egalari birinchi bo‘limda tashabbusni qo‘lga olib, ikki bor gol urishga muvaffaq bo‘lishdi.

Tanaffusdan so‘ng yigitlarimiz faollikni oshirdi va Javohir Abdulvosiyev hisobni qisqartirishga erishdi. Biroq uchrashuvning so‘nggi daqiqalarida mezbonlar qarshi hujumdan unumli foydalanib, yana bir gol kiritishdi va bahs 3:1 hisobida yakunlandi.

O‘zbekiston va Qozog‘iston yoshlar terma jamoalari o‘rtasidagi ikkinchi o‘rtoqlik uchrashuvi 5-may kuni bo‘lib o‘tadi.