Myunxenning «Bavariya» klubi prezidenti Gerbert Xayner jamoaning moliyaviy imkoniyatlari haqida fikr bildirdi. Ushbu mavsumda jamoa mamlakat chempioni bo‘ldi va Chempionlar ligasining kamida yarim finaligacha yetib bordi.

«Oxirgi 25 yil ichida biz har mavsumda, hatto Kovid pandemiyasi davrida ham foyda ko‘rdik. Buni aytish oson tuyulishi mumkin, lekin aslida biz — bitta katta oilamiz. Keynni misol qilib olsak: uning shartnomasida, agar u Angliyaga qaytishni istasa, jamoani tark etishi mumkinligi haqida band bor edi. Biroq bu masala hatto muhokama ham qilingani yo‘q, u Myunxenda o‘zini o‘z uyidagidek his qilmoqda», — deya Xaynerning so‘zlaridan iqtibos keltiradi L’Equipe.

«Bavariya» boshqa klublardan farqli ravishda ish yuritishi, ammo Keynning transferi uchun 95 million yevro sarflagani haqidagi fikrlarga javoban Xayner shunday dedi:

«Raqobat tobora kuchayib bormoqda, ayniqsa ingliz klublarining ta’sirini hisobga olsak. APL teletranslyasiyalardan yiliga 4 milliard yevro oladi, Germaniyada esa bu ko‘rsatkich 1,2 milliard yevroni tashkil etadi. Agar bizga Keyn kabi o‘yinchi kerak bo‘lsa, uni sotib olamiz. Lekin, boshqa tomondan, bizda Musiala, Pavlovich, Stanishich va Karl kabi futbolchilar bor. Ushbu mavsumda yoshlar akademiyamizning 10 nafar tarbiyalanuvchisi professional futbolda debyut qildi. Bunday uyg‘unlik bizga muvaffaqiyatga erishish va moliyaviy jihatdan mas’uliyatli faoliyat yuritishda yordam beradi».

Eslatib o‘tamiz, «PSJ» va «Bavariya» o‘rtasidagi Chempionlar ligasi yarim finalining ilk uchrashuvida Parij klubi 5:4 hisobida g‘alaba qozongan edi. Javob uchrashuvi 6 may kuni Toshkent vaqti bilan soat 00:00'da bo‘lib o‘tadi.