«Bavariya» hujumchisi Xarri Keyn Chempionlar ligasining pley-off bosqichida ketma-ket oltita o‘yinda gol urib, musobaqa rekordini takrorladi.

Keyn kecha «PSJ»ga qarshi kechgan yarim final javob uchrashuvining (1:1) 94-daqiqasida gol urishga muvaffaq bo‘ldi. Bu bilan u pley-offning ketma-ket oltita bahsida raqiblar darvozasini ishg‘ol etgan tarixdagi ikkinchi futbolchiga aylandi. Bungacha bunday natijani faqat Krishtianu Ronaldu (2012-2013 yillarda) qayd etgan edi.

Shuningdek, Keyn yana bir ko‘rsatkich bo‘yicha Ronalduga tenglashib oldi: u Chempionlar ligasining ketma-ket uchta mavsumida kamida 12 ta golda bevosita ishtirok etgan (gol + assist).

Afsuski, Keynning bu tarixiy rekordi «Bavariya»ni finalga olib chiqish uchun yetarli bo‘lmadi. Ikki o‘yin natijasiga ko‘ra 5:6 hisobida imkoniyatni boy bergan Myunxen klubi musobaqa bilan xayrlashdi.