«Rayo Valyekano» «Strasbur»dan ustun kelib, Konferensiyalar Ligasi finaliga yo‘l oldi. Shu tariqa, kelasi mavsumda La Liganing beshta klubi yana Chempionlar Ligasida ishtirok etadigan bo‘ldi.

Ispaniya UYEFA koeffisiyentlar jadvalida 22 094 ochko bilan beshinchi o‘rinni egallab turibdi va 21 786 ochkoga ega Germaniyani ortda qoldirmoqda.

Ayni paytda Ispaniya chempionatining kuchli beshligidan «Barselona» (88 ochko), «Real» (77 ochko), «Vilyarreal» (68 ochko), «Atletiko» (63 ochko) va «Betis» (53 ochko) joy olgan. 6-o‘rinda borayotgan «Selta» mavsum tugashiga 4 tur qolganda beshinchi pog‘onadan 6 ochkoga ortda qolmoqda.

Agar «Rayo Valyekano» Konferensiyalar Ligasi finalida «Kristal Pelas»ni mag‘lub etsa, kelasi mavsumda La Liganing jami to‘qqizta jamoasi yevrokuboklarda ishtirok etadi.

2025/26 yilgi mavsumda Chempionlar Ligasining umumiy bosqichida «Barselona» (5-o‘rin), «Real» (9-o‘rin), «Atletiko» (14-o‘rin), «Atletik» (29-o‘rin) va «Vilyarreal» (35-o‘rin) ishtirok etgan edi.