«Milan» egasi va RedBird Capital Partners asoschisi Jerri Kardinale klubning Yevropadagi NBA loyihasining bir qismiga aylanish istagi haqida gapirib berdi.
«NBA, ehtimol, AQSHdan chiqqan yagona chinakam xalqaro sport turi hisoblanadi. Maykl Jordan, Medjik Jonson va Larri Byord ishtirokidagi «Orzular jamoasi» davrlari o‘tdi. Siz buni Olimpiadada ko‘rdingiz, NBA’ning so‘nggi yillardagi ko‘plab eng yaxshi o‘yinchilari (MVP) Yevropadan kelganligida ko‘rdingiz. Yevropa basketbolda haqiqiy kuchga aylandi va Amerika hamda Yevropa o‘rtasida hamkorlik qilish uchun ulkan imkoniyat mavjud.
Yevroliga 26 yildan beri mavjud va jamoalarning aksariyati foyda keltirmaydi. Bu barqaror emas. Shuning uchun, menimcha, Yevropa futbol klublari NBA bilan hamkorlik qilishi va NBA basketbolini Yevropaga olib kelishi kerak. Men Milanda aynan shuni amalga oshirishga harakat qilaman.
Biz «Milan» brendini rivojlantirishda davom etishimiz, muxlislar bazasiga imkoniyatlar taklif qilishimiz va moliyaviy profilni yaxshilashimiz lozim. Bularning barchasi hamma bir-biridan foyda ko‘rishi kerak bo‘lgan ekotizimning bir qismidir», — deya Kardinalening so‘zlaridan iqtibos keltirmoqda La Gazzetta dello Sport nashri.
