Londonning «Vest Xem» klubi agar mavsum yakunlariga ko‘ra APLdan tushib ketadigan bo‘lsa, taxminan 100 million funt sterling (joriy kurs bo‘yicha 115 million yevro) qiymatidagi futbolchilarini sotishiga to‘g‘ri keladi.
The Guardian nashrining xabar berishicha, klub moliyaviy barqarorlikni saqlab qolish va moliyaviy feyr-pley (FFP) qoidalarini buzmaslik uchun shunday qadam tashlashga majbur bo‘ladi.
Eslatib o‘tamiz, ayni damda «Vest Xem» APL turnir jadvalida 18-o‘rinni egallab turibdi va 17-pog‘onadagi «Tottenxem»dan ikki ochkoga ortda qolmoqda. Shu bilan birga, «bolg‘achilar»ning mavsumda atigi bitta o‘yini qolgan, «Tottenxem»da esa ikkita uchrashuv bor. Agar «shporlar» seshanba kuni bo‘lib o‘tadigan bahsda «Chelsi»ni mag‘lub etsa, «Vest Xem»ni muddatidan oldin quyi divizionga ravona qiladi.
