«PSJ» vingeri Dezire Due jamoadoshi Xvicha Kvarasxeliyaning o‘yini haqida o‘z fikrlari bilan o‘rtoqlashdi.

«Kvarasxeliya maydonda qilayotgan ishlari bilan ajralib turadi, chunki unda ajoyib dribling va himoyada o‘ynash qobiliyati bor. Himoyachilar uchun unga qarshi turish juda qiyin bo‘lsa kerak. U mashg‘ulotlarda ham, o‘yinlarda ham meni hayratda qoldiradi. Jamoamizda yuqori darajada o‘ynash tajribasiga ega bo‘lgan va men o‘rnak oladigan futbolchilar bor — Kvarasxeliya, Dembele, Barkola. Bunday jamoadoshlar o‘sishga yordam beradi», — dedi Due.

Joriy mavsumda Xvicha Kvarasxeliya «PSJ» safida barcha turnirlarda 47 ta o‘yin o‘tkazib, 19 ta gol urdi va 10 ta golli uzatmani amalga oshirdi.