Madridning «Real» klubi hujumchisi Vinisius Junior jamoadagi kelajagi borasidagi savollarga oydinlik kiritdi. Braziliyalik futbolchining amaldagi shartnomasi bir yildan so‘ng yakuniga yetishi sababli, ommaviy axborot vositalarida uning klubni tark etishi mumkinligi haqida turli gap-so‘zlar tarqalayotgan edi.

Biroq 25 yoshli hujumchi Madriddan hech qayerga ketmoqchi emasligini qat’iy ta’kidladi:

«Men o‘zimni hech qachon «Real»dan tashqarida tasavvur qilmaganman. Bu — mening orzumdagi klub. Shu bois har bir lahzani qadrlayman. Doimo aynan shu yerda to‘p surishni orzu qilganman. Yosh bo‘lishimga qaramay, jamoa sardorlaridan biriga aylanganim men uchun katta sharaf. Bunday holatlar ko‘p ham kuzatilavermaydi. Men bu yerda umrbod qolishni istayman», — deya Vinisiusning so‘zlarini keltiradi Madrid Xtra.

Eslatib o‘tamiz, Vinisius yakunlangan mavsumda «qaymoqranglilar» safida 53 ta o‘yinda maydonga tushib, 22 ta gol urdi va 14 ta golli uzatmani amalga oshirdi.