«Yuventus» bosh direktori Damyen Komolli Chempionlar ligasiga yo‘llanma ololmagani fonida klub ba’zi futbolchilarni sotishga majbur bo‘lishini ma’lum qildi. Turinliklar A Seriya mavsumini turnir jadvalida 6-o‘rinda yakunladilar.

«Bu muvaffaqiyatsizlik va men buni inkor qilmoqchi emasman. Biz yaqin kelajak uchun poydevor qo‘ydik, ammo natijalar kutilganidek bo‘lmadi. Ichimda chuqur og‘riqni his qilyapman.

Biz yana bir futbolchining ketishini kutyapmiz. Bu kutilmagan holat bo‘ladi, deb ayta olaman. Shu bilan birga, UEFA bilan kelishuvga ko‘ra moliyaviy talablarga rioya qilishimiz kerakligi fonida jamoaning umumiy darajasi ko‘tarilishini kutmoqdamiz. Kenan hech qayerga ketmaydi», — dedi Komolli.

Shuningdek, direktor kapitalni oshirish rejalashtirilmaganini va Spalletti mavjud vaziyatni yaxshi tushunishini ta’kidladi. Uning so‘zlariga ko‘ra, klub cheklangan sharoitda harakat qilishga majbur bo‘lsa-da, bu raqobatchilardan o‘zib keta oladigan «Yuventus»ni qurishga xalaqit bermaydi.