Milanning «Inter» klubi o‘ng qanot himoyachisi Denzel Dyumfris «Liverpul»ga o‘tishdan bosh tortdi. Insayder Fabrisio Romanoning xabar berishicha, ingliz grandi oxirigacha 30 yoshli futbolchi uchun kurashdan chiqmagan bo‘lsa-da, o‘yinchi muzokaralar olib borishni istamadi. Gap shundaki, niderlandiyalik futbolchi «Real»ga o‘tishga qaror qilgan va Madrid klubiga allaqachon rozilik bildirgan.

Dyumfrisning «neradzurrilar» bilan tuzgan shartnomasida 20 million yevro miqdorida tovon puli belgilangan bo‘lib, ispan klubi aynan shu imkoniyatdan foydalandi. «Liverpul» ushbu lateral (qanot himoyachisi) uchun qishqi transfer oynasida ham da’vogarlik qilgan, biroq o‘shanda ish rasmiy taklifgacha yetib bormagan edi.