«Feyenoord» klubi bosh murabbiy Robin van Persining iste’foga chiqarilganini e’lon qildi. Tomonlar hamkorlikni muddatidan oldin to‘xtatdilar.

«Biz jamoa natijalarini ichki tomondan atroflicha baholab chiqdik va ham yevrokuboklarda, ham Erediviziyada (Niderlandiya chempionatida) qo‘lga kiritilgan ochkolar soni kamayish sari ketayotganini ko‘rdik. Yakunda yangi mavsumni yangi bosh murabbiy bilan boshlagan ma’qul, degan xulosaga keldik», — deya klub matbuot xizmati texnik direktor Devi Rigoning so‘zlarini keltirmoqda.

Van Persi ushbu lavozimni 2025 yilning 24 fevralidan buyon egallab kelayotgan edi. 42 yoshli mutaxassis qo‘l ostida jamoa jami 58 ta o‘yin o‘tkazib, 30 ta g‘alaba, 9 ta durang va 19 ta mag‘lubiyat qayd etdi.

2025/26 yilgi mavsumda «Feyenoord» Niderlandiya chempionati turnir jadvalida ikkinchi o‘rinni egalladi.