«Chelsi» «Yuventus» hujumchisi Dushan Vlaxovichni transfer qilishni rejalashtirmoqda. Bu haqda La Gazzetta dello Sport xabar berdi.

Manba ma’lumotiga ko‘ra, London klubi vakillari allaqachon futbolchining otasi va agenti Milosh Vlaxovich bilan aloqa o‘rnatgan. Shuningdek, «Bavariya», «Barselona» va «Nyukasl Yunayted» ham Vlaxovichning otasi bilan muzokaralar o‘tkazgani ta’kidlanmoqda. Yaqin kunlarda Milosh Vlaxovich Turin klubi rahbariyati bilan o‘g‘lining shartnomasini uzaytirish masalasini muhokama qilishi kutilmoqda.

Dushan Vlaxovich 2022 yil qishida «Yuventus» safiga qo‘shilgan edi. O‘tgan mavsumda 26 yoshli serbiyalik hujumchi barcha turnirlarda 23 ta uchrashuvda maydonga tushib, 10 ta gol urdi va 2 ta golli uzatmani amalga oshirdi.

Transfermarkt portali ma’lumotlariga ko‘ra, futbolchining bozordagi qiymati 35 million yevroni tashkil etadi.