Braziliya terma jamoasi hujumchisi Vinisius Junior 2026 yilgi jahon chempionati davomida Madridning «Real» klubi bilan shartnomasini uzaytirish mavzusini muhokama qilishni istamasligini ma’lum qildi.
«"Real" bilan shartnomani uzaytirishmi? Hozir men butun diqqat-e’tiborimni Braziliya terma jamoasiga qaratganman.
Jahon chempionati yakunlanib, yangi mavsum boshlanganidan keyin "Real" haqida gaplashaman», — dedi Vinisius. Uning so‘zlarini jurnalist Fabrisio Romano keltirdi.
25 yoshli (12 iyul kuni 26 yoshga to‘ladi) braziliyalik futbolchining «Real» bilan amaldagi shartnomasi 2026/27 yilgi mavsum oxiriga qadar mo‘ljallangan.
O‘tgan mavsumda Vinisius barcha musobaqalar doirasida 53 ta uchrashuvda maydonga tushib, 22 ta gol urdi va 14 ta golli uzatmani amalga oshirdi.
Braziliya terma jamoasi JCH–2026 guruh bosqichida 14 iyun kuni Marokash, 20 iyun kuni Gaiti va 25 iyun kuni Shotlandiya terma jamoalariga qarshi bahs olib boradi.













