«Arsenal» shu yozda «Tottenxem»ni tark etadigan yosh markaziy himoyachi Elayja Apsonga jiddiy qiziqish bildirmoqda.

«Arsenal»ning sobiq himoyachisi Mettyu Apsonning o‘g‘li bo‘lgan 18 yoshli futbolchi «shporlar»ning professional shartnoma borasidagi taklifini rad etdi va 2026 yilning 30 iyunida klubdan ketadi. Bu haqda avvalroq Lilywhite Rose insayderlik platformasi xabar bergan edi, endilikda esa ushbu ma’lumotni The Athletic nashri tasdiqladi.

Yakunlangan mavsumda Elayja «Tottenxem»ning o‘smirlar va yoshlar jamoasida to‘p surib, umumiy hisobda 23 ta o‘yinda maydonga tushdi, 1 ta gol urdi, 1 ta golli uzatmani amalga oshirdi, 3 ta sariq va 1 ta qizil kartochka oldi. Shuningdek, futbolchi hisobida Angliya U18 terma jamoasi safida 2 ta o‘yin va 1 ta gol bor.