Italiyaning «Komo» klubi 23 yoshli yarim himoyachi Martin Baturinaning transferi bo‘yicha Angliya klubidan tushgan taklifni rad etdi. Bu haqda taniqli insayder Nikolo Skira ma’lumot bermoqda.

Manbaning xabariga ko‘ra, «Aston Villa» klubi Baturina uchun «Komo»ga 50 million yevrodan ortiq mablag‘ taklif qilgan, biroq rad javobini olgan. «Komo» rahbariyati xorvatiyalik iqtidor egasini jamoaning «daxlsiz» futbolchisi deb hisoblaydi.

Ortda qolgan klub mavsumida Baturina barcha musobaqalarda jami 34 ta o‘yinda maydonga tushib, raqiblar darvozasini 8 bor ishg‘ol qildi va 4 ta golli uzatmaga mualliflik qildi.

Baturinaning «Komo» klubi bilan ayni paytdagi amaldagi mehnat shartnomasi 2030 yilning o‘rtalariga qadar mo‘ljallangan.