Fransiya terma jamoasi hujumchisi Kilian Mbappe Jahon chempionatlaridagi sermahsulligi bilan hayratda qoldirishda davom etmoqda.
Madridning «Real» klubi futbolchisi yana gol urdi — bu safar u 1/8 final doirasidagi Paragvayga qarshi uchrashuvda (1:0) o‘z nomini tabloga yozdirib qo‘ydi. Fransiyaliklar forvardi ikkinchi bo‘limda penaltini aniq amalga oshirdi.
Shu tariqa, Mbappe 2018 yilgi debyutidan boshlab Jahon chempionatlarining pley-off bosqichida urgan gollari sonini 11 taga yetkazib oldi. Opta nashrining qayd etishicha, bu xuddi shu davr oralig‘ida Braziliya, Angliya (ikkalasida ham 10 tadan), Portugaliya (9) va Ispaniya (4) terma jamoalari urgan gollardan ko‘proqdir. Tilga olingan ushbu to‘rtta terma jamoa ham joriy mundialda o‘z ishtirokini davom ettirmoqda va Fransiya kabi turnir favoritlari qatorida e’tirof etilyapti.
Kilian Mbappe ayni damda 7 ta gol bilan Lionel Messi bilan birgalikda JCH-2026 ning eng yaxshi to‘purarlari ro‘yxatida birinchi o‘rinni bo‘lishib turibdi.
