«Manchester Siti» himoyachisi Abduqodir Husanovning agenti futbolchining 2023 yilda «Lans»ga o‘tish jarayonini yodga oldi.

— Qodir bilan Toshkent — Istanbul reysida ekonom-klassda uchayotgandik, u yerdan keyin «Lans»da o‘ynashi uchun Fransiyaga samolyotga o‘tishimiz kerak edi. Men undan: «Top-5 ligaga uchayotganingni his qilyapsanmi?» deb so‘radim. U esa: «To‘g‘risi, meni Rossiyaga sotishsa kerak, deb o‘ylagandim», deb javob berdi. — «Lekin ko‘ryapsanmi, hammasi sen xohlagandek bo‘ldi».

Vaholanki, birinchi marta gaplashganimizda, qayerga borishni xohlashi haqidagi savolimga u: «Evropaga», deb javob bergandi. Rossiyadan unga jiddiy qiziqish bor edi, katta pullar taklif qilishayotgandi. Atrofida: «Ikki yil "Sochi"da o‘ynab tursang, keyin xohlagan joyingga ketasan», deb uqtiradigan odamlar ham aylanib yurishardi. Lekin bunday ishlar odatda nima bilan tugashini o‘zingiz yaxshi tushunasiz.

— «Lans» Husanovni qanday payqab qolgandi?

— Klub skauti 2023 yilning may oyida yoshlar o‘rtasidagi Jahon chempionatiga Argentina terma jamoasi markaziy himoyachisini kuzatish uchun uchib kelgandi. Argentinaning birinchi o‘yini esa bizga qarshi edi va unga Qodir yoqib qoldi. U «Lans»ning bosh skautiga qo‘ng‘iroq qilib: «Meni O‘zbekistonning ikkinchi o‘yinida ham qoldiringlar, chunki u yerda bir bola menga ma’qul keldi», deb iltimos qildi.

Ikkinchi o‘yinni ham ko‘rib, ikkita uchrashuv yakunlari bo‘yicha hisobot va videolavha tayyorlab, «Lans» bosh murabbiyiga yubordi. Ko‘rganlari murabbiyda katta taassurot qoldirdi va u: «Menga shu bolani topinglar», dedi», — deya hikoya qilib berdi g‘ayrat Hasbiullin.