Ange Postekoglu «An-Nasr»da ish boshladi va Saudiya Arabistonining amaldagi chempioni boshqaruvidagi rejalari bilan o‘rtoqlashdi. Avstraliyalik mutaxassis Jorje Jezushning o‘rnini egalladi va Ar-Riyod klubi bilan ikki yillik shartnoma imzoladi.

Postekoglu Saudiya Arabistoniga o‘tish uning uchun yangi professional chaqiriq bo‘lganini tushuntirdi.

«Faoliyatim davomida yangi chaqiriqlarni qabul qilishni, turli sharoitlarda ishlashni va shu orqali rivojlanishni yoqtirganman. Endi menda yangi mamlakatda va yangi jamoa bilan o‘z kuchimni sinab ko‘rish imkoniyati bor», — deya murabbiyning so‘zlarini keltiradi Goal.com.

Mutaxassis Saudiya Pro-ligasi so‘nggi yillarda sezilarli darajada o‘sgani va yanada raqobatbardosh bo‘lib qolganini ta’kidladi.

«Chempionat ancha kuchaydi. Hozir g‘alaba uchun kurasha oladigan bir nechta klublar bor va xalqaro turnirlar tobora qiyinlashmoqda.

Faqat g‘alaba qozonishning o‘zi emas, balki qanday o‘ynayotganingiz ham muhim. Biz muvaffaqiyatga erishishga va bu mavsumni o‘ziga xos qilishga harakat qilamiz», — deya qo‘shimcha qildi murabbiy.

Saudiya chempionatida yangi mavsum 13 avgust kuni boshlanadi.