«Real» tarbiyalanuvchisi Manuel Anxel Moran faoliyatini «Almeriya»da davom ettirishga yaqin.

ABC tarqatgan ma’lumotga ko‘ra, 22 yoshli yarim himoyachi «Kastilya»ni tark etib, Segundada ishtirok etayotgan «Almeriya» safiga qo‘shiladi. Transfer yaqin vaqt ichida rasman e’lon qilinishi kutilmoqda.

Cadena SER ham 20 avgust kuni «Almeriya» Manuel Anxel transferini hal qilgani haqida xabar berdi. Manba futbolchining ham tayanch, ham markaziy yarim himoyachi sifatida harakat qila olishi va to‘p bilan ishlashdagi qobiliyatini alohida qayd etgan.

Manuel Anxel «Real» akademiyasi tarbiyalanuvchisi bo‘lib, so‘nggi yillarda «Kastilya»ning muhim futbolchilaridan biriga aylandi. U «Real»ning asosiy jamoasida ham imkoniyatga ega bo‘lib, La Liga va Chempionlar ligasi bahslarida maydonga tushgan. Yozda futbolchiga boshqa klublardan ham qiziqish bo‘lgan — xususan, «Deportivo» uni o‘z safiga qo‘shib olish imkoniyatini ko‘rib chiqqan.

Madridliklar ham 22 yoshli futbolchining ketishi mumkinligini hisobga olib kelayotgandi. AS nashri 15 avgust kuni «Kastilya»da kutilayotgan transferlar haqida yozar ekan, Manuel Anxel jamoani tark etishi kutilayotgan futbolchilar qatorida ekanini qayd etgan.

«Almeriya» yosh ispaniyalikni markaziy chiziqni kuchaytirish maqsadida olib kelmoqda. Jamoa yozda yarimhimoyada bir qator o‘zgarishlarni amalga oshirdi va Manuel Anxel yangi mavsum uchun ushbu pozisiyadagi navbatdagi kuchaytirish bo‘ladi.

Shu tariqa, «Almeriya» «Real» akademiyasidan chiqqan yana bir futbolchiga ishonch bildirmoqda. Jamoa safida madridliklar tarbiyalanuvchisi Serxio Arribas ham to‘p surmoqda.