Kataloniyaning «Barselona» klubi xavbeki Mark Kasado Angliya Premyer-ligasi klublari o‘rtasida talabga ega. Bu haqda «Guardian» nashriga tayanib, «Mundo Deportivo» xabar bermoqda.
O‘yinchining transferi bo‘yicha muzokaralarni «Sanderlend» boshladi. Shuningdek, APLning yana bir nechta klublari — «Nyukasl», «Aston Villa» va «Brayton» ham Kasadoning xizmatlariga qiziqish bildirmoqda. Bundan tashqari, yarim himoyachining Saudiya Arabistoni chempionatida ham variantlari bor, biroq Mark Yevropa futbolida qolishni afzal ko‘rmoqda.
Ispaniya La Ligasining o‘tgan mavsumida 22 yoshli xavbek 24 ta uchrashuvda maydonga tushgan. Kasado bitta golli uzatmaga mualliflik qilgan va bitta sariq kartochka olgan.
