UEFA prezidenti Aleksander Cheferin Rossiyaning xalqaro musobaqalardan chetlatilishi holati haqida fikr bildirdi va mamlakat terma jamoalari hamda klublarining qaytishi ehtimoliga baho berdi.

Sloveniyalik rahbar Yevropa futbol assosiasiyalari ittifoqi nazariy jihatdan 17 yoshdan kichik futbolchilarni musobaqalarga qo‘yish masalasini yana muhokama qilishi mumkinligini tan oldi. Ammo amaldagi siyosiy vaziyatda to‘liq qaytish imkoni yo‘qligini ta’kidladi.

«O‘smirlar masalasida nima bo‘lishini ko‘ramiz, ammo kattalar haqida gapiradigan bo‘lsak, Ukrainadagi mojaro yakunlanmaguncha biror narsa qila olamiz, deb o‘ylamayman. Uning baribir to‘xtashiga umid qilamiz, ammo bu holat allaqachon to‘rt yildan beri davom etmoqda», — dedi Cheferin The Rest Is Politics: Leading YouTube kanaliga bergan intervyusida.

UEFA rahbari Rossiyani chetlatish qarori siyosiy bosim natijasida qabul qilinganini ham tan oldi. Uning so‘zlariga ko‘ra, aks holda Yevropaning 45 ta davlati hukumatlari o‘z mamlakatlari jamoalarining musobaqalarda ishtirok etishini taqiqlashga tayyor edi.

Rossiya terma jamoalari va klublari 2022 yil fevral oyi oxiridan buyon xalqaro musobaqalardan rasman chetlatilgan.