Mark Gexi «Manchester Siti»ning «Bornmut»ga qarshi mavsumdagi ilk o‘yinida yarim himoyada harakat qilishiga jamoadoshlari katta yordam berganini ta’kidladi.
Angliya terma jamoasi futbolchisi asosan markaziy himoyachi sifatida o‘ynaydi. Biroq «Bornmut»ga qarshi 2:1 hisobidagi g‘alabali bahsda u tayanch yarim himoyachisi pozisiyasida maydonga tushdi va ishonchli o‘yini evaziga uchrashuvning eng yaxshi futbolchisi deb topildi.
Gexi o‘zi uchun odatiy bo‘lmagan pozisiyada ham o‘zini qulay his qilganini aytib, bunda mashg‘ulotlardagi tayyorgarlik va jamoadoshlarining yordami muhim rol o‘ynaganini bildirdi.
«O‘zimni yaxshi va erkin his qildim. O‘yindan oldingi hafta davomida murabbiy bilan mashg‘ulotlarda bu borada juda ko‘p ishladik.
Atrofimda shunchalik ko‘p kuchli jamoadoshlar borligi men uchun omad. Ular o‘yin oldidan ham, uchrashuv davomida ham yangi pozisiyaga moslashishimga yordam berishdi. Bu rol menga juda yoqdi», — dedi Gexi.
