Fransiyaning «Pari Sen-Jermen» klubi bosh murabbiyi Luis Enrike Liga 1 3-turida «Monako»ga (1:2) qarshi uchrashuvdagi mag‘lubiyatdan keyin jamoada kimlar o‘z o‘yinini yaxshilashi kerakligi haqida fikr bildirdi. Shuningdek, ispaniyalik mutaxassis parijliklar bosh murabbiyi sifatidagi to‘rtinchi mavsumidagi motivasiyasi haqida gapirdi.

«Men muxlislarimiz bilan bir xil hissiyotdaman. Biz ajoyib jamoa bo‘lgan «Monako»ga qarshi o‘yinni nazorat qilishga harakat qildik, ammo ular uchrashuvni bizning pressingimizdan juda yaxshi chiqib ketish qobiliyati bilan boshlashdi. O‘yinning dastlabki daqiqalari og‘ir kechdi, ammo umuman olganda, menimcha, biz shubhasiz g‘alabaga loyiq edik.

Futbolchilardan mamnunman, garchi biz individual va jamoaviy jihatdan yanada kuchayishimiz kerak bo‘lsa-da. Murabbiy sifatida men ham o‘z ustimda ishlashim lozim, chunki turnir jadvalidagi holatimiz yaxshi emas.

Biz qiziqarli loyihaning bir qismimiz. Bir jamoa bosh murabbiyi sifatida to‘rtinchi mavsumimni boshlayotganim birinchi marta. Hozirgi motivasiyam bu yerdagi ishimning dastlabki kunlaridagidan ham yuqori. Prezident va klub rahbariyatining ishonchi men uchun juda muhim. Hanuz motivasiyam yuqori va juda baxtliman. Parijda uzoq vaqt qolishga umid qilaman», — deya Enrikening so‘zlarini parijliklar rasmiy sayti keltirdi.

Liga 1 turnir jadvalida Luis Enrike shogirdlari 3 turdan keyin 2 ochko bilan 12-o‘rinda bormoqda.