«Betis»dan uchralgan mag‘lubiyatdan so‘ng «Real» bosh murabbiyi Joze Mourinyu o‘z futbolchilarini «sodda» deb atagan edi. Portugaliyalik mutaxassis shogirdlari raqibdan farqli ravishda hakamdan muayyan qarorlarni talab qilishga urinmaganini ta’kidlagan.
Chempionlar ligasidagi ishtirok boshlanishi oldidan Mourinyu o‘sha so‘zlariga yana bir bor izoh berdi.
«Bu masalada madaniy jihat ham bor. Balki men ishlatgan «sodda» so‘zi salbiy ma’noda qabul qilingandir, ammo men buni tanqid sifatida aytmaganman. Shunchaki voqelikni qanday bo‘lsa, shunday tasvirlaganman.
Ertaga esa men nima demoqchi bo‘lganimni juda yaxshi tushunasiz. Buni anglash siz uchun juda oson bo‘ladi», — deya Mourinyuning so‘zlarini Goal keltirdi.
«Real» seshanba kuni Chempionlar ligasi doirasida o‘z maydonida «Inter»ni qabul qiladi.
