“Real Madrid” hujumchisi Kilian Mbappe agar imkoniyati bo‘lganida jamoaga qaysi futbolchilarni olib kellishi haqidagi savolga javob berdi. Ispaniyaning AS nashri xabariga ko‘ra, fransiyalik yulduz bu borada asosan “qirollik klubi” afsonalarini tilga olgan.

“Agar ularni qaytarishning iloji bo‘lganida, Krishtianu Ronaldu, Zinedin Zidan yoki braziliyalik Ronaldoni tanlagan bo‘lardim. Krishtianu bemalol qaytishi mumkin. Zidan ham vaqti-vaqti bilan o‘ynab turibdi. Ronalduga kelsak, uning darajasi hech qachon pasaymaydi. Ular ‘Real’ning chinakam timsollaridir. Bu futbolchilar jamoa uchun juda ko‘p narsa bergan va haligacha Madrid muxlislarining cheksiz hurmatiga sazovor bo‘lib kelmoqda”, deydi Mbappe.

Ma’lumot uchun, Mbappe joriy mavsumda barcha turnirlar doirasida 7 ta uchrashuvda maydonga tushib, 8 ta gol va 2 ta golli uzatmaga mualliflik qildi. Hujumchining madridliklar bilan amaldagi shartnomasi 2029 yilning yoziga qadar mo‘ljallangan. Transfermarkt portaliga ko‘ra, uning bozordagi qiymati 200 million yevroni tashkil etadi.