«Bavariya» hujumchi Harri Keyn bilan shartnomani uzaytirishdan manfaatdor. Myunxenliklar kuzatuv kengashi a’zosi Karl-Xayns Rummenigge muzokaralar bo‘lib o‘tayotganini ma’lum qildi.

«Harrining akasi va otasi ayni damda Yan-Kristian Drizen bilan muzokaralar olib borishmoqda. Men ular yaxshi to‘xtamga kelishlariga optimistik ruhda qarayman», — deydi Rummenigge Goal portaliga bergan intervyusida.

Ilgari Rummenigge 30 yoshdan oshgan futbolchilarga faqat bir yillik shartnoma taklif qilish kerak deb hisoblar edi, ammo Keyn borasida u bu qoidadan mustasnolik qilishga tayyor.

«Biz Harrining mahoratiga to‘liq ishonamiz. U uch yil davomida faqat bir marta jarohat olganini unutmaslik kerak».

Joriy mavsumda Keyn klub miqyosida 7 ta o‘yinda maydonga tushib, 6 ta gol urdi va bitta golli uzatma muallifi bo‘ldi.