Fabrisio Romano ma’lumotiga ko‘ra, "Arsenal" va Deklan Rays yangi shartnoma bo‘yicha muzokara olib bormoqda.

London klubi 27 yoshli yarim himoyachini uzoq muddatga jamoada saqlab qolishni istamoqda. Tomonlar o‘rtasidagi muloqot ijobiy kechayotgani va yangi kelishuv Raysga yaxshilangan moliyaviy shartlarni taqdim etishi kutilmoqda.

Raysning amaldagi shartnomasi 2028 yilgacha mo‘ljallangan bo‘lib, "Arsenal"da uni yana bir yilga uzaytirish imkoniyati ham bor. Uning hozirgi maoshi haftasiga taxminan 240 ming funtni tashkil qiladi. Yangi bitim orqali angliyalik futbolchi klubning eng yuqori maosh oluvchi o‘yinchilari qatoriga kirishi mumkin.

Deklan Rays "Arsenal"ga 2023 yilda "Vest Xem"dan 105 million funt evaziga ko‘chib o‘tgan va shundan beri jamoaning asosiy futbolchilaridan biriga aylangan.