"Liverpul" yarim himoyachisi Aleksis Mak Allisterning kelajagi noaniqligicha qolmoqda. "Qizillar" rahbariyati argentinalik futbolchi bilan shartnomani uzaytirish bo‘yicha muzokaralarni boshlashni rejalashtirmayapti. Uning amaldagi kelishuvi 2028 yilda yakunlanadi.

Yarim himoyachi bu vaziyatdan norozi va mish-mishlarga ko‘ra, faoliyatini davom ettirish uchun turli variantlarni ko‘rib chiqmoqda. Transfer News Live nashri Football Insider manbasiga tayanib xabar berishicha, Makallisterga "Chelsi" da’vogarlik qilmoqda.

"Ko‘klar" yarim himoya chizig‘ini kuchaytirishni istamoqda va 27 yoshli futbolchini yanvar oyidayoq o‘z safiga qo‘shib olishga urinishi mumkin.

Transfermarkt portali Aleksis Mak Allisterning bozor qiymatini 70 million yevroga baholamoqda. Joriy mavsumda jahon chempioni "Liverpul" safida 7 ta o‘yin o‘tkazib, 2 ta gol urdi va 1 ta golli uzatmani amalga oshirdi.