"Manchester Yunayted"ning afsonaviy murabbiyi ser Aleks Fergyuson demensiya (bu xotira, fikrlash, nutq va kundalik ko‘nikmalarning susayishiga olib keladigan orttirilgan aqliy zaiflik holati) bilan bog‘liq xavotirlari haqida gapirdi. 84 yoshli mutaxassis ushbu kasallik rivojlanishi ehtimoli uni tashvishga solishini tan oldi.
"Men futbolchilik paytimda bosh bilan juda ko‘p o‘ynaganman. Barcha futbolchilar bundan o‘tgan. Demensiya — inson yoshi o‘tgan sari duch kelishi mumkin bo‘lgan jiddiy sinov. Men doimo o‘zimga: "Men 84 yoshdaman. Agar 85 yoshgacha yashasam, demak, buning o‘zi yaxshi", deb aytaman", — deya Fergyusonning so‘zlarini Goal keltirdi.
O‘tgan oyda Fergyuson axill payi bilan bog‘liq muammo sabab maxsus ortopedik poyabzalda ko‘rinish bergan edi. Shunga qaramay, u "Manchester Yunayted"ni tribunadan qo‘llab-quvvatlashda davom etmoqda.
