Европа чемпионлар лигасининг чорак финал босқичи доирасида бўлиб ўтган дастлабки ўйинда "Париж воқеаси" такрорланди. "Барселона" сафарда яна йирик ҳисобда мағлуб бўлди.

"Ювентус" дастлабки ўйинни идеал даражада ўтказди ва ўзи яратган вазиятлардан ўта самарали фойдаланди. Айниқса, Пауло Дибала жуда аниқ зарбалар билан ўйиннинг 7 ва 22-дақиқаларида тер Штеген қўриқлаётган дарвозанинг битта бурчагини икки марта ишғол қилди.

Бу икки гол орасида "Барса" битта жавоб тўпини киритиши керак эди. Месси ажойиб пас билан Иньестани бирга бир вазиятга чиқариб юборди. Андрес жарима майдончаси ичида йўллаган нозик зарбани Буффон қайтаришга эришди.

Иккинчи бўлим бошида жамоалар очиқ ўйин намойиш қилишди. Натижада ҳар иккала жамоа гол уриш учун яхши имкониятларга эга бўлишди. Месси 16 метрлардан йўллаган зарба натижасида тўп устун ёнидан ўтиб кетган бўлса, Игуаин яккама-якка вазиятда йўллаган зарбани тер Штеген қайтаришга муваффақ бўлди. 55-дақиқада эса бурчакдан етказилган узатмани Жоржо Кьеллини бош билан дарвозага жойлаб қўйди.

Баҳснинг 68-дақиқасида Мессининг пасидан кейин бу сафар Суарес бирга-бир вазиятга қочиб кетиб, зарба берди. Тўп олис устун ёнидан ўтиб кетди.

"Барселона" хавфли вазиятлар яратиш бўйича рақибдан ортда қолмади. Аммо ҳимоядаги сусткашлик ва вазиятлардан фойдалана олмаслик туфайли йирик ҳисобда имкониятни бой берди. Жавоб ўйини бир ҳафтадан кейин "Камп Ноу"да бўлиб ўтади.

ЕЧЛ, Чорак финал, дастлабки ўйин
"ЮВЕНТУС" - "БАРСЕЛОНА" - 3:0
11 апрель, 23.45, «Ювентус Стэдиум»
Голлар: 1:0 – 7 Дибала, 2:0 – 22 Дибала, 3:0 – 55 Кьеллини.
Ювентус – Буффон, Бонуччи, Алекс Сандро, Дани Алвес, Кьеллини, Пьянич (Бардзальи, 89), Хедира, Куадрадо (Лемина, 73), Манжукич, Дибала (Ринкон, 81), Игуаин.
Барселона – тер Стеген, Пике, Умтити, Матье (Андре Гомеш, 46), Маскерано, Иньеста, Ракитич, Сержи Роберто, Неймар, Суарес, Месси.
Огоҳлантиришлар: Дани Алвес (28), Суарес (53), Иньеста (57), Манжукич (63), Хедира (74), Лемина (90), Умтити (90).