Келаётган шанба 3 июн куни Чемпионлар лигаси финал баҳсида "Реал" ҳамда "Ювентус" клублари ғолиблик учун майдонга тушади.
"Реал" форварди Криштиану Роналду учун енгилмас ҳимояга эга "Ювентус" клуби қулай рақиблардан бири ҳисобланади. Португалиялик футболчи "Кекса синьора"ларга қарши 4 учрашувда майдонга тушган ҳолда 5 бор ўз номига гол ёздириб қўйишга эришган.
Дастлаб 2013/14 мавсум гуруҳ босқичида "Бернабеу"даги баҳсда (2:1) дубл қайд этган бўлса, орадан 2 ҳафта ўтиб жавоб учрашувида (2:2) жамоанинг дастлабки голига муаллифлик қилган. Бундан ташқари 2 йил аввал мусобақанинг ярим финал босқичидаги ҳар икки учрашувида ҳам (1:1, 1:2) бир маротабадан гол муаллифига айланган ва бу сафар унинг голлари Мадридликларни финал йўлланмасига эга чиқишларига камлик қилган.
