«Барселона» президентлигига собиқ номзод Агусти Бенедито Хосеп Мария Бартомеу бошчилигидаги клуб раҳбариятига ишончсизлик вотуми эълон қилмоқчи.
Бу ҳақда Mundo Deportivo хабар бермоқда.
Бенедито фикрига кўра, Бартомеу ва унинг ходимлари «Барселона»ни бошқаришга қодир эмас. Клубда сўнгги 40 йил ичидаги жиддий инқироз юзага келган. Бундан ташқари, раҳбарият Неймарнинг солиқлар бўйича жиноят иши юзасидан прокуратура билан шармандали тарзда келишиб олган. Ўз навбатида Бартомеу ва собиқ президент Сандро Роселнинг қилмишлари ҳам жазосиз қолган.
Энди Бенедито ишончсизлик вотумини эълон қилиш учун 14 кун ичида «Барселона» клуби аъзоларининг 15% овозини ёки 16500 имзо тўплаши керак.
