«Реал» сардори Серхио Рамос мавсум якунлари ҳақида гапирди.

«Зидан ўзидан олдинги барча мураббийларнинг рекордини янгилади. У футболчилик иқтидорини мураббийликка кўчира олди. Футболчилар ишончини қозонди, бундай катта клубда бу иш осон эмас. Биз у билан жуда яқинмиз.

Футболда ўз ютуқларингдан завқ олишга вақт тополмайсан. Тўрт йил ичида уч марта ЕЧЛ ғолиби бўлдик, бунга ақл бовар қилмайди. Фаолиятимни якунлагач, эришган ютуқларим ҳақида фикр юритаман, медалларимни томоша қиламан.

2017 йил мен учун жуда яхши ўтди. «Реал»да яна кўп вақт тўп суришга қодирман. Жисмонан ва руҳан ўзимни жуда яхши ҳис қилмоқдаман.

Янги мавсумда, Майамида «Барселона» билан ўртоқлик ўйинини ўтказамиз. Демак, иложи борича тезроқ жисмоний ҳолатимизни яхшилаб олишимиз керак. Бу билан янги совринлар сари йўлга чиқишдан олдин «Манчестер Юнайтед» ва «Барселона»га қарши ўйинларда ўзимизни синаб кўришимиз мумкин бўлади» - деди Рамос.