«Аякс» клуби 20 ёшли футболчиси Абдулҳақ Нурийнинг саломатлиги тўғрисида баёнот берди.

Маълумки, футболчи «Вердер»га қарши ўртоқлик ўйинида майдонга ҳушсиз йиқилиб, шифохонага олиб кетилганди. У ерда Нурийнинг юрагида муаммо борлиги, шунингдек, мияси ҳам жиддий шикастлангани аниқланганди.

«Нурий жонлантириш бўлимини тарк этди. У сунъий комадан чиқарилди. Абдулҳақ мустақил равишда нафас олмоқда. Аммо танасининг бошқа аъзоларида ўзгариш йўқ. Футболчининг оиласи уни қайғурган ва қўллаб-қувватлаган инсонларга миннатдорчилик билдиради ва унинг ҳақига дуо қилишларини сўрайди» - дейилади клуб баёнотида.

Аввалроқ, футболчининг акаси уни ҳеч қачон гапира олмаслиги, юролмаслиги ва одамларни таний олмаслиги ҳақида айтган эди.