Англиянинг “Манчестер Юнайтед” клуби молиявий ҳисоботини эълон қилди.

Унга кўра, “қизил иблислар” 2016–2017 йил мавсумида 581 млн фунт даромад топган. Соф фойда эса 80.8 миллионни ташкил этади.

Ушбу кўрсаткич 2015/16 йил мавсумида 515,3 миллион, соф фойда 68,9 миллионни ташкил этганди. Жамоа ўтган мавсумда аввалгисидан 66 миллион кўпроқ даромад топишга эришган, соф фойда орасидаги фарқ эса 11,9 миллионга тенг.

“Манчестер Юнайтед”нинг маошлар ҳақидаги баёнотига кўра 263.5 млн фунт, яъни, ўтган мавсумдагига қараганда 31.3 миллионга кўпроқ эканлиги ҳам маълум бўлди. “Манчестер Юнайтед” Англия Премьер-Лигаси жамоалари орасида футболчиларига энг кўп маош тўлаётган жамоа ҳисобланади.

Шунингдек, “Манчестер Юнайтед” қарзларини ҳам камайтиришга эришди. Жамоа эгаси ҳисобланмиш, Глейзерлар оиласи қарзларини 2005 йилда жамоани сотиб олганидан кейин 260.9 миллиондан 213.1 миллионга камайтирди.

“Қизил иблислар”нинг умумий фойдаси мавсум якунига кўра, 585 миллион фунтгача ошиши кутилмоқда.

“МЮ” 1992/93 йилдан бери совринлар орқали 1 миллиард фунт ишлаб олган илк жамоа бўлганди. Маълумот учун, “Forbes”нинг янги кўрсаткичларига кўра, “Манчестер Юнайтед” дунёнинг энг бой жамоаси ҳисобланади.