«Манчестер Юнайтед» ҳужумчиси Ромелу Лукаку Америкадаги можарода айбсиз эканини айтди.
Маълумки, футболчи ёзда, Беверли-Хиллзда дам олаётганида, «МЮ» клубига ўтганини нишонлаш мақсадида, туни билан шовқин-сурон кўтариб, катта базм уюштирган. Бундан ранжиган қўшнилар 6 марта полицияни чақиришга мажбур бўлган. Шундан сўнг, Лукаку ҳибсга олиниб, полиция қароргоҳига олиб кетилган.
Sky Sports хабарига кўра, 2 октябрь куни Лос-Анжелесда бу можаро юзасидан суд жараёни ўтказилди. Лукаку унда кўрсатма бериб, ўз айбини тан олмади.
Энди прокурорлар футболчининг айбини исботловчи далилларни судга тақдим қилишига тўғри келади. Агар Лукаку суд томонидан айбдор деб топилса, уни катта миқдорда жарима кутмоқда.
