УЕФА чемпионлар лигаси 1/8 финали дорасидаги «Барселона» ҳамда «Челси» ўртасидаги жавоб учрашуви ўз поёнига етди.

Ўйин кутилганидек шиддатли ва мухлисбоп тарзда ўтди. Баҳсни мезбонлар тезкор гол билан бошлашди. Учрашувнинг 3-дақиқасида каталонияликларнинг ташкил этган ажойиб комбинациясини Месси айёрона зарба билан голга айлантирди, 1:0.

Мазкур голдан сўнг лондонликлар ҳам олдинга ўтиб, вазиятлар яратишга уриниб кўришди. Бироқ 20-дақиқага келиб қарши ҳужумни ўтказиб юборишди.

Мазкур вазиятда Лионель Месси бирин кетин рақибдан ўтиб кетиб, қулай вазиятда турган Усмон Дембелега тўпни узатди ва франциялик ёш ҳужумчи кучли зарба билан тўпни дарвозанинг олис юқори бурчагига жойлаб қўйди, 2:0.

Мазкур голдан сўнг ўйин янада кескинлашиб кетди ва футболчилар ҳар бир вазият учун жон-жаҳдлари билан курашишди, аммо бир қатор вазиятларга қарамай, дастлабки 45 дақиқаликда бошқа гол урилмади.

Иккинчи бўлимни мезбонлар яна ҳужумкор руҳда бошлашди. 46-дақиқадаёқҳисоб йириклашиши мумкин эди, аммо Суареснинг зарбасидан сўнг Тибо Куртуа «Челси» жонига оро кирди.

Кейинги дақиқалар эса асосан лондонликларнинг урунишлари остида кечди, «Барселона» эса тўпсиз ҳолда ўз вазиятини кутди ҳамда имкон туғилган заҳоти рақибни жазолашга уринди.

Бунга эришди ҳам – 63-дақиқага келиб анашундай қарши ҳужумлардан бири Лионель Мессининг дубли билан якунланди, 3:0.

Учинчи голдан сўнг эса ўйиндаги кескинлик бироз пасайди десак, муболаға бўлмайди. Тўғри жамоалар вақти-вақти билан ҳужумга ўтиб яхшигина вазиятлар ҳам яратишди, аммо айниқса, «Челси»нинг ҳужумларида сўнгги паллага келиб, нимадир етишмай қолаверди.

Шу билан бирга қайд этиш керакки, каталонияликлар ижро этган бурчак зарбасидан сўнг Тибо Куртуа дарвозасини тўртинчи голдан сақлаб қолган бўлса, «Челси» ижросидаги яна бир бурчак зарбасида Рудигернинг зарбасини дарвоза тўсини қайтарди. Аммо ўйинда бошқа шол урилмади.

Биринчи ўйин – 1:1, иккинчи ўйин – 3:0 - «Барселона» кейинги босқичда.

ЕЧЛ. 1/8 ФИНАЛ.

Барселона Испания – Челси Англия 3:0 (2:0)

14 март, «Камп Ноу»

Голлар: 1:0 – 3 Месси, 2:0 – 20 Дембеле, 3:0 – 63 Месси.

Барселона: тер Стеген, Умтити, Пике, Альба, Ракитич, Серджи Роберто, Иньеста (Паулиньо, 56), Бускетс (Андре Гомеш, 61), Дембеле (Алеиш Видаль, 67), Месси, Суарес.

Челси: Куртуа, Аспиликуэта, Кристенсен, Рюдигер, Мозес (Дзаппакоста, 67), Виллиан, Фабрегас, Азар (Педро, 82), Канте, Алонсо, Жиру (Мората, 67).

Огоҳлантиришлар: Сержи Роберто (22), Виллиан (45), Жиру (49), Алонсо (75).

Биринчи учрашув – 1:1