Бугун Ўзбекистон Миллий олимпия қўмитасида Бош котиб Жасур Матчанов, МОҚ Президенти ёрдамчиси Сардор Абдуҳолиқов, Ўзбекистон давлат жисмоний тарбия университети ректори Комил Ярашев ва университет профессор-ўқитувчилари ўртасида учрашув бўлиб ўтди.

Ушбу учрашувда мураббийлар тайёрлаш тизимини қайта кўриб чиқиш, университет битирувчиларини мураббийлик соҳасига янада қизиқтириш, ёш мураббийлар учун илмий-методик қўлланмалар яратиш ва бошқа масалалар муҳокама этилди.

Барчамизга маълумки, Ўзбекистон давлат жисмоний тарбия университетини ҳар йили юзлаб талабалар битириб чиқишади. Аммо, уларнинг ҳаммаси ҳам кейинчалик мураббийлик соҳасини танламайди. Аксинча, ҳуқуқни муҳофаза қилиш, молия ёки иқтисодий йўналишларда фаолият олиб боришни маъқул кўрадилар.

Айнан шунинг учун ҳам университет битрувчиларини мураббийлик касбига қизиқтириш, келажакда улардан етук мутахассислар тайёрлаш масаласи бугунги куннинг долзарб муаммоларидан бири ҳисобланади. Учрашув давомида Ўзбекистон давлат жисмоний тарбия университети қошида терма жамоалар учун малакали мураббийлар етказиб бериш бўйича махсус илмий гуруҳ ташкил этишга келишиб олинди. Ўз навбатида, Жасур Матчанов ҳам Миллий олимпия қўмитаси ушбу жараёнда фаол иштирок этишини таъкидлаб ўтди.