Парижнинг ПСЖ клуби “Реал”га ҳужумчи Криштиану Роналду трансфери учун 150 миллион евро, футболчининг ўзига йиллик маош сифатида 45 миллион евро тўлашга тайёр. Бу ҳақда “AS” нашри хабар бермоқда.
 
Маълумотга кўра, парижликлар “қироллик клуби” раҳбарлари билан учрашишга улгурган ва трансфер учун 150 миллион евро тўлашни таклиф қилган. Роналдунинг шартномасидаги товон пули аслида 1 миллиард еврони ташкил қилади.
 
Бундан ташқари, ПСЖ Роналдунинг йиллик маошини 45 миллион евро этиб белгилаб, португалиялик юлдузни клубда энг кўп маош оладиган (Неймарнинг маоши 37 миллион евро) футболчига айлантирмоқчи. Париж жамоаси берадиган маош миқдори “Барселона” ҳужумчиси Лионель Месси билан деярли тенг.
 
Францияликлар ҳужум чизиғида Мбаппе – Неймар – Роналду триосини ҳосил этишмоқчи аммо, бунга бир нечта фактлар ҳалақит қилиши мумкин.
 
Биринчидан “Реал” Роналдуни қўйиб юборишга қарши, иккинчидан “қироллик клуби” ПСЖдан Неймарни харид қилишни режалаштириб юрибди. Роналдунинг Парижга йўл олиши Неймарнинг Мадрид клубига ўтиши ҳақидаги тахминлардан умуман йироқда.
 
Асосийси, УЕФА ПСЖни молиявий фэйр-плей шартларини бажармаётганлиги сабаб яна жазога тортиши ҳам мумкин.