Англия терма жамоаси «Тоттенҳэм» ҳужумчиси Ҳарри Кейн Британия империяси ордени билан мукофотланади, деб ёзади Mirror.
Манба маълумотига кўра, мукофот 25 ёшли футболчига Англия терма жамоаси сафида ЖЧ-2018да кўрсатган ўйинлари учун топширилади. Орден тақдим этилиши ҳақида расман келаси ҳафта маълум қилиниши кутилмоқда.
Эслатиб ўтамиз, Кейн Россиядаги мундиалда Англия термаси билан яримфиналга қадар етиб борган эди. Финал остонасида Хорватиядан енгилган (1:2) жамоа учинчи ўрин учун курашда Бельгия термасига имкониятни бой берган эди (0:2).
ЖЧда Кейн энг яхши тўпурар бўлди, Англия терма жамоаси эса охирги 30 йилдаги энг яхши натижасини қайд этди.