"Реал" ярим ҳимоячиси Лука Модрич Испания Ла лигасининг 18-тури доирасида бўлиб ўтган "Реал Сосьедад"га ўйин борасида ўз фикрларини билдириб ўтди.

"Жамоамиздаги кўп футболчи ўз даражасида ўйнай олмаяпти. Ҳар бир ўйин аввалида ўз дарвозамиздан тўп олиб чиқяпмиз. Бунга йўл қўймаслигимиз керак. Очиғини тан олиш керак: бу омад билан боғлиқ масала эмас. Кўп вазиятлар яратаётганимизга қарамай, гол ура олмаяпмиз. Ўз навбатида кўп тўп ўтказиб юборяпмиз. Буларнинг сабаби бор.

Ҳакам бу сафар ўйинни яхши бошқармади. Аммо бизнинг муаммоларимиз фақат ҳакамлар ёки видеотакрорлар билан боғлиқ эмас. Бироқ улар бизга ёрдам бермаётганини ҳам инкор қилмайман. Бизнинг муаммоларимиз бошқа томонда.

Ҳакам менга VAR тизимидагилар пенальти бўлмаганини айтишганини таъкидлади. 11 метрли жарима зарбаси белгиланмагани мени ҳайрон қолдирди. Аммо ўйин тугаб бўлди, ҳеч нарсани ўзгартириб бўлмайди. Испанияда VAR барчани ҳайрон қолдирмоқда. "Реал" эса барчадан кўп жабр чекмоқда. Лекин бу мавзуни муҳокама қилмоқчи эмасман.

Биз ўйинимизни яхшилашимиз зарур. Ҳозир идеал ҳолатда эмасмиз. Биз майдонда якдил жамоа бўлишимиз лозим. Чемпионат бой берилди, демаймиз. "Ўйиндан ўйингача" режимида ишлашимиз керак. Барчамиз ўтириб, эркакларча гаплашиб олишимиз керак", – деди Модрич "Marca" нашрига берган интервьюсида.