Европа чемпионлар лигасининг чорак финал босқичи доирасида «Манчестер Юнайтед» ўз уйида «Барселона»ни қабул қилди.

Каталонияликлар бу ўйинда тезкор гол уришга муваффақ бўлишди. Лионель Месси жарима майдончаси ичида тўпни қабул қилиб, олис устун томон узатма берган пайтда қанот ҳаками Маттео Пассери каталонияликлар ҳужумчиси Луис Суаресни офсайдда қолган деб ҳисоблаб, голни бекор қилди. Аммо рефери Жанлука Рокки VARга мурожаат қилди ва гол тоза урилганини қайд этди. Суареснинг бош билан йўллаган зарбадан кейин тўп «МЮ» ҳимоячиси Люк Шоуга тегиб, дарвоза чизиғини кесиб ўтди.

Майдон эгалари гол ўтказиб юборганларига қарамай, вазиятни ўнглаш учун фаол ўйнашда давом этди. Ҳужумларнинг бирида Далот яқин масофадан бош орқали дарвоза томон аниқ зарба бера олмади.

Иккинчи тайм аввалида устунлик манкунианликлар томонида бўлди. Аммо "Барселона" яхши ҳимояланди ва ўз дарвозаси дахлсизлигини сақлаб қолди. Шундан сўнг Вальверде иккита ўзгаришни амалга оширди ва тактикани ўзгартиришга муваффақ бўлди. "Кўк-анорранглилар" қолган дақиқаларда тўпни жуда яхши назорат қилиб, мезбонларга ҳеч қандай имконият қолдиришмади.

Шу тариқа, "Барселона" сафардан кичик ҳисобдаги ғалаба билан қайтди. Жавоб ўйини 16 апрель куни "Камп Ноу"да бўлиб ўтади.

Европа чемпионлар лигаси, чорак финал, дастлабки ўйин
Манчестер Юнайтед Англия – Барселона Испания 0:1 (0:1)
Гол: 0:1 – 12, автогол Шоу.
Манчестер Юнайтед – Де Хеа, Смоллинг, Линделеф, Шоу, Янг, Погба, Фред, Мактомини, Диогу Далот (Лингард, 74), Рэшфорд (Перейра, 85), Лукаку (Марсьяль, 68).
Барселона – тер Штеген, Пике, Альба, Нелсон Семеду, Лангле, Артур (Сержи Роберто, 66), Бускетс (Аленья, 90), Ракитич, Коутиньо (Видаль, 65), Месси, Суарес.
Огоҳлантиришлар: Бускетс (17), Шоу (19), Видаль (71), Лингард (76), Смоллинг (85).