Дерби Каунти ҳақида эшитгансиз, у Реал ёки Барселонадан қарироқ кўҳна клуб. 2018 йилнинг 31 май куни мана шу клубни Фрэнк Лэмпард мураббий сифатида қабул қилиб олганди. У 2016 йилги мавсумни Нью-Йорк сити клубида якунлаганидан кейин Дерби Каунтининг таклифигача айтарли иш қилмаётганди. Челси клуби афсонаси бугун ўз суюкли жамоасини бошқармоқда.

Уэйн Руни ҳам Лэмпард каби океан ортида — Ди Си Юнайтед клубида тўп сурди. Бугундан эътиборан у Дерби Каунти сафида майдонга тушиши мумкин. Шартнома ярим йилга мўлжалланган. Биласизми нима, Руни ярим йилдан кейин Дербига бош мураббий бўлиши эҳтимолдан ҳоли эмас. Бу эса унинг Олд-Траффордга қайтиши учун навбатдаги қадам бўларди.

Дербига нима дейсизми? У Лэмпард билан 4 йиллик шартнома тузганди. Натижада Челси ўзининг собиқ футболчисини қайтариш учун товон тўлади. Бу каби компенсациялар Руни ёки Лэмпардларга тўланган маошларни бемалол ёпиб кетади. Қайтимига эса бу юлдузлар Дербини британ нашрларининг олд саҳифасида ушлаб туради. Уларнинг фамилияси туширилган футболкалар Дербининг қолган футболчилари либосидан 10 марта кўпроқ сотилади.

Лэмпард Челсига, Артета Арсеналга қайтганида, нима учун Руни МЮнинг бугунги болалари бурнини ерга ишқаб югуртирмаслиги керак? Погбалар ивирситаётган атмосфера учун принципиал инсонлар жуда керак чамамда.