Лондоннинг «Тоттенхэм» клуби бош мураббийи Жозе Моуриньо Диего Марадонанинг вафоти ҳақида муносабат билдирди.

«Марадона ҳақида гапиришим шарт эмас, чунки уни бутун дунё билади ва уни ҳеч ким унутмайди. Диего – бошқача. Унинг дўстим бўлганлар буюк имтиёзга эга бўлган. Шуни айтишим мумкинки, у менинг ажойиб дўстим эди, у билан телефонда гаплашиб турардик ва албатта, бир неча маротаба учрашганмиз.

Унинг юраги катта эди. Мен уни соғинаман. Биз уни соғинсак, унинг ўйинларини Google орқали топсак бўлади. Лекин биз у ердан Диегони топа олмаймиз.

Бугунги кунимни йигитлар билан у ҳақида ва у билан бирга ўтказган вақтимиз ҳақида суҳбатлашишга сарфладим. Ғалаба қозонганимизда эмас, мағлубиятга учраганимизда унинг қўнғироқ қилишларини соғинаман.

Ғалаба қозонганимиздан кейин менга қўнғироқ қилиш шарт эмаслигини у биларди, қийин пайтларда эса доим ёнимда бўлди ва ҳар доим мағлубиятдан кейин: «Жозе, сен зўрлигингни унутма»-дерди. Унинг мана шундай далдалари бор эди. Мен Диегони соғинаман», — Моуриньонинг сўзларидан иқтибос келтирмоқда Goal.