Каталониянинг "Барселона" клуби ҳужумчиси Антуан Гризманн гаджетлар ишлаб чиқарадиган Хитойнинг Huawei компанияси билан ҳамкорликни тўхтатишини эълон қилди.
Футболчи Huawei компанияси ўз заводларида уйғурларнинг мажбурий меҳнатидан фойдаланганликда айблангандан сўнг, Huawei билан ҳамкорлик шартномасини бекор қилишга қарор қилди. Huawei уйғурларни қийноққа солишни ташкил қилганликда ҳам гумон қилинмоқда. Хабар қилинишича, компания ушбу этник озчилик ҳақидаги маълумотларни Хитой расмийларига етказган бўлиши мумкин.
2020 йил март ойида эълон қилинган Австралия стратегик сиёсат институти (АСПИ) мутахассисларининг ҳисоботига кўра, Хитой ҳукумати камида 80 минг уйғурни Huawei, Aplle, BMW, Nike, Samsung, Sony каби 83 халқаро компанияларнинг фабрикаларида ишлашга мажбур қилган.
Эслатиб ўтамиз, 2019 йилнинг декабрида "Арсенал" ярим ҳимоячиси Месут Ўзил Хитойни мамлакатида яшовчи уйғурларни таъқиб қилишда айблаган эди.
Уйғурлар Шарқий Туркистоннинг туб аҳолиси, динига кўра мусулмонлардир. Хитой уйғурларга қарши репрессив сиёсат олиб боришда ва уларнинг диний ва маданий ҳуқуқларини чеклашда айбланмоқда. Хитойнинг Шинжон минтақасида қарийб 10 миллион уйғур яшайди.
