Суперлига қолдирилган тури доирасида «Қизилқум» билан баҳс олиб борган АГМК жамоаси бош мураббийи Миржалол Қосимов ўйин ҳақида ўз фикрларини билдирди.
«Футбол шундай қизиқарли ўйин. Кимдир хато қилади, кимдир ўшандан фойдаланади. Бизда биринчи таймнинг ўзида имконият бўлганди, аммо Гадоев гол ура олмади.
Агар ўша гол бўлганида вазият бошқача бўларди деб ўйлайман. Иккинчи таймда шошилдик, ҳисобда ортда қолаётганимиз боис оддий вазиятларда тўп йўқотдик. Акром Комиловнинг қизил карточкаси ҳам панд берди. Сўнгги дақиқаларда ҳеч бўлмаса дурангга эришишга уриндик.
Бундан хулоса чиқарамиз, ҳамма ўйинда ютишнинг иложи йўқ. Ғалаба ва мағлубият ёнма-ён юради. Кейинги ўйинларга тайёргарлик кўришини бошлаймиз. Менга ёққан тарафи, жамоа бир киши кам бўлсада мағлубиятга учраб турган паллада ҳакам хуштаги чалингунга қадар охиригача курашди. Бунинг учун йигитларга миннатдорчилик билдираман»,—дейди Қосимов.
