28-сентябрь, сешанба куни Чемпионлар Лигасидаги сенсацион натижа қайд этилди. Молдованинг "Шериф" клуби Мадридда "Реал"ни мағлуб этди. Яна бир марта ушбу ўйин билан боғлиқ фактлар ва учрашув қаҳрамонларига тўхталиб ўтамиз.
Рақамлар нима дейди?
Одатдагидек диққатни рақамларга қаратайлик. “Галактикос”нинг зарба беришдаги деярли саккиз карра устунлигини кўрдик. Аммо жамоаларнинг нархи ва молиявий имкониятлари бунданда каттароқ фарқни кўрсатмоқда. Transfermarkt.de жами "Реал" футболчиларини 792,5 миллион еврога, "Шериф"ни 12,38 млн еврога баҳолаган. Мадрид клуби футболчилари 64 баробар (!) қимматроқ. Аммо Тираспол клуби Молдова чемпионатининг сўзсиз пешқадами – унинг паст молиявий имконияти Молдовада энг яхшиси ҳисобланади. Лекин Европада “Шериф” шунчаки “фақир” клуб сифатида кўрилади.
Эътиборимни тортган яна бир сон бу “нол”. Мадриддаги ўйинида айнан шунча Молдова фуқаролигини олган футболчилар майдонга тушган. Сешанба куни кечқурун Мадрид стадиони майдонига чиққан 15 футболчи орасида Греция, Колумбия ва Бразилиядан иккита, ҳамда Италия, Перу, Шимолий Македония, Гана, Мали, Ўзбекистон, Люксембург, Тринидад ва Тобаго вакиллари бор эди. 11 мамлакатдан йиғилган футболчилар украиналик бош мураббий Юрий Вернидуб қўл остида майдонга тушишган. Қайдномада Молдовадан тўрт футболчи бор эди, лекин уларнинг ҳаммаси захира ўриндиғида ўйинни тўлиқ томоша қилишган.
Бу факт Россия матбуотида легионерлар чегараси ҳақида қизғин мунозарага сабаб бўган. Лигеонерлар бўйича чеклов қўймаган “Молдова” ўз чемпионати клубларига берган эркинлиги ўз мевасини кўрсатаётгандек кўринмоқда. Лекин, бундан миллат футболи ўсармикин? Айнан мана шундай қарама-қаршиликлар негизи кўплаб ички чемпионатларида чекловлари мавжуд юртларда баҳсларни келтириб чиқарди.
Бутун Европа уларни тан олди
Ҳар қанақасига ҳам "Шериф" мураббийлар штаби ва футболчилари ўзини қаҳрамон каби ҳис қилишга ҳақли. Қаҳрамонона юриш Жасурбек Яхшибоевнинг голидан сўнг бошланди. Унинг гол нишонлаш чоғидаги ҳаракатлари бутун жамоага умид берган бўлса, юртимиз футбол ишқибозларига чексиз фахр туйғусини тақдим этди. Ундан сўнг “Шериф”нинг ўзига ишончи ортиб кетди ва ҳар бир футболчиси ўзини бир ўйинга болсада, иқтидорли деб ҳисоблашди. Менимча, бу ўйиндан сўнг Молдова клуби футболчиларига “кучли бешлик”дан “совчилар” ёғилиб келишса керак. Айнан кимлар ўз ўйини билан скаутларни ақл-у ҳушини ўгирлаган? Қуйида улар ҳақида сўзлашамиз.
Жасурбек Яхшибоев, ҳужумчи, 24 ёшда (тахминий нархи - 500 минг евро)
Биринчи бўлимнинг ўрталарида ҳамюртимиз ҳисобни очувчи голга муаллифлик қилди. Биринчи 45 дақиқаликда Жасурбек дублни ҳам расмийлаштириши мумкин эди. Аммо омад ундан юз ўгирди. Унинг йўллаган хавфли зарбаси дарвоза устуни ёнгинасидан ўтиб кетди. Шуни айтиш керакки, Жасур анчадан буён яхши клублар қизиқиши доирасида эди. 2020-йилнинг қишида “Динамо Киев” юртдошимизга қизиқиш билдирган эди. Лекин охир-оқибат Жасур Польшанинг “Легия” жамоаси аъзосига айланганди. Бу йил ёзда эса у “Шериф” таркибига келиб қўшилди. Менимча Вернидуб бундай хужумчини ижара эвазига бўлса-да, жамоага келгандиган хурсанд бўлса керак. Яхшибоев “галактикос” дарвозасини ишғол этган иккинчи ўзбекистонлик эканлигини эъслатиб ўтмоқчиман.
Гиоргиос Атанасиадис, дарвозабон, 28 ёшда (тахминий нархи - 600 минг евро)
Грек дарвозабони иккинчи таймда кўплаб зарбаларни бартараф этди. У “Шериф”да Яхшибоевдан бир ой олдин пайдо бўлган, шунингдек, Гиоргиос “АЕК”дан қарзга олиб келинган. У охирги марта 2017/18 йилги мавсумда “АЕК”да биринчи рақамли дарвозабон бўлган. Аммо "Бернабеу"даги ўйинидан сўнг, у ўз фаолиятини янги босқичга олиб чиқиш учун барча имкониятларга эга. У ўйинда 11та сейвни амалга оширди, тўпга чиқишларда ажойиб ҳаракат қилди ва шерикларига ишонч бағишлаб турди. У фақат пенальтидан гол ўтказиб юборди (лекин зарба йўналишини топганди). УЕФА томонидан ЕЧЛда ҳафтанинг энг яхши футболчиси деб тан олиниши бежиз эмас. Ҳақиқатдан у ўйин қаҳрамони бўлганди.
Себастян Тилл, ҳужумкор ярим ҳимоячи, 27 ёш (тахминий нархи - 400 минг евро)
Аввалига бироз ўзини тиклаб олиш учун “Тамбов”да пайдо бўлган. Лекин, қулаётган “Тамбов”да кўп вақт тўп тепмаган Тилл учрашувдаги якуний нуқтани қўйган эди. У “Шериф” таркибда 6 ой олдин пайдо бўлганди ва эндиликда “Бернабеу”да ажойиб голи билан мухлислар ёдида қоладиган бўлди. Менимча, люксенбурглик футболчига кимдир ўйиндан бир кун олдин, “Эртага “Шериф” “Реал”ни мағлуб этади, сен эса ўйиннинг сўнгида ғалаба тўпини киритасан”, — деса ишонмаган бўларди. Лекин у бу ишни бажарди: урган голи шунчаки мадридликларнинг овозини ўчириб қўйди.
22 ёшли Фернандо Констанза, ўнг қанот ҳимоячиси (тахминий нархи - 500 минг евро)
Бразилия - барча даражадаги Европа чемпионатлари учун легионерларни етказиб берувчи асосий мамлакат. Ёш Костанта учун бу футбол дунёсидада ўз ўрнини эгаллаш учун иккинчи уриниш. Ўсмирлик чоғида у ўзини "Лилль"нинг иккинчи жамоасида синаб кўрди ва шу ёзда у “Ботафого”дан эркин агент сифатида келди, у ерда у деярли майдонга тушмас эди. Мухлислар голни эслашади, лекин Костанзанинг ҳимоядаги ишларининг самарадорлиги селекционерларнинг эътиборидан четда қолмади. Бразилиялик футболчининг ҳисобида 4 та зарба ва бир нечта зарба йўлига қалқон бўлиш статитикаси мавжуд. Бразилияликнинг ғалабага қўган ҳиссаси юқоридагилардан кам эмас, албатта.
Криштиану, чап қанот ҳимоячиси, 28 ёш (600 минг эвро)
Тираспол ҳимоясининг чап қанотида бошқа бразилиялик ҳаракат қилади, у ҳимоявий ўйинда унчалик кучли эмас, лекин айнан Яхшибоевнинг голига ассисти туфайли унинг ўйини қадрланмоқда. "Шахтёр" билан ўтказилган биринчи турда Криштиану шерикларига икки марта голли узатма берган эди. Учта голли узатма билан у ҳозирда "Аякс" ҳужумчиси Антони билан Чемпионлар лигасининг энг яхши ассистентлари рўйхатида биринчи ўринни бўлишиб турибди. Албатта ҳозирданоқ унга Ла лига клубларидан қизиқиш бўлаётганлиги тўғрисида миш-мишлар учрамоқда.
Миржалол Пардабоев тайёрлади.
